نصيحة لي غادي يزور الرباط اول مرة

– لي بغى يجي مرحبا و مكاينش لي يهظر معاك وخا منعرف فين تمشي غير هو لا ماكنش عندك غرض في هذه الاحياء لي غادي نقول ليك بلا ماتمشي ليها : دوار الحاجة، التقدم، الملاح، المعاضيد، دوار الكرعة، وداك شارع الفرح، كيدي لكولشي إلا الفرح.
– غادي تشوف البوليس بزاف في الشوراع، عادي ما واقع والو، راه غير حيث العاصمة
– بغيتي تركب فالترام قطع ورقة و تفاليدي حتال لداخل بشوية عليك ماكاين لي يزربك
– جاي من كازا غادي تدخل على أكبر مشروع ديال لاكوط و الطريق خاوية و دير فبالك ملي كتشوف ممر الراجلين عمر حبس و دير السينيالات ديال الاومبان باش ليموراك يفهمو بلي راه الناس باغيا تقطع
– تلفتي سول راه مكاينش ديك الهظرة ديال الرباطيين كيتلفو (هي صراحة كايتلفو، لكن ماشي كولشي) غير نتايا جيب سمية البلاصة لي بغيتي كاملة حيت هنايا عندنا جوج جوج من الحاجة كاين السييج و الملحقة
– كليتي شي حاجة و هاز معاك شي زبل الله يرحم بيها الواليدين ماتلوحوش فالارض راه كاين بلايصهم فين
– بغيتي تقصي غير حك جيبك و لعلك ترضى داكشي كيبدى من 5 دراهم عند مالين خبزة لي فالسويقة حتال ما لانهاية
– بغيتي تضرب الحوت شد طاكسي يحطك فسلا و سير للمرسى روى حتى تزدح و رجع حيت مانصحكش تبقى تمى بزاف
– بغيتي الكفتة و تحس بالمعنى ديال الكفتة سول على ديور الجامع
– الى كنتي مرفح و من صحاب اضطرابات فالمعدة طلع لأگدال قصي السوشي و لا الطاكوس
– كنتي من محبي الآثار.. عندك لودايا و حسان و شالة.. و يمكن ليك تمشي ليهم على رجليك
– كنتي من صحاب الشوبينغ سير طلع “لميگامول” كنتي من صحاب خويا بغيت نتقدى شي بياسة هبط للسويقا تلقى گاع لي بغيتي
– كنتي من هادوك لي كيبغيو يتنغمو راه حداك لي بواط ديال أم كلثوم ناتلين و كلما حكيتي جيبك كلما لقيتي ما حسن
– سولتي شي واحد و كيجاوبك و هو ماكيشوفش فيك ولا ماوقفش و جاوبك.. ماتديهاش عليه راه ماشي عياقة فينا ولكن حنايا دايرين هكداك الله يعفو
– الى دزتي من حدا البرلمان ماتبقاش تشوفيه و تغوت وااااااا بنـــــكيران.. حيت اخويا راه مابقاش بنكيران هادي اولا و ثانيا راه ماشي تما كيسكنو الوزراء
– الى كنتي دايز و بان ليك البوليس كيصفر و شفتي الحديد مهيب دايز و كيجريو غير خوي الطريق حيت يا اما الماليك دايز و لا واحد فولادو وبلاما تبقاو تقـولو ياااه شفتيه شفتيه حيت عادي ديما كيدوز من حدانا
و فالاخير مرحبا بيكم
مولاي صلاح الدين مراسي